१५ चैत्र, वालिङ । वालिङ चेम्बर अफ कमर्सद्वारा फागुन २१ देखि चैत्र ३ गतेसम्म आयोजित प्रथम पिंक सिटी वालिङ महोत्सव–२०८१ भव्य र सभ्य रुपमा सम्पन्न भएको छ । महोत्सव आयोजना, दर्शकको उल्लेख्य साहभागिता, करोडौंको कारोबार, चुस्त व्यवस्थापन लगायत सबै कोणबाट महोत्सव सफल भएको वालिङ चेम्बर अफ कमर्सका वरिष्ट उपाध्यक्ष मणिप्रसाद पङ्गनीले जनाएको छ ।
वरिष्ट उपाध्यक्ष पंगेनीले आफूहरुले सोचेभन्दा भव्य र सभ्य रुपमा महोत्सव सम्पन्न भएको दाबी गरे । ‘चेम्बर अफ कमर्सको आयोजनामा महोत्सव आयोजना गर्नु पहिलो सफलता हो,’ उनले भने, ‘हामीले सोचेभन्दा महोत्सव बढी सफल भयो ।’ नयाँ संस्था र नयाँ कार्य समितिलाई पहिलो पटकमै ठूलो सफलता मिलेको उनको भनाइ छ ।
सुरक्षा, स्वयम्सेवक र प्रवेशद्वार व्यवस्थापनले महोत्सव अवलोकन गर्न आउने अपाङ्गता, असहाय, बृद्धबृद्धा, बालबालिका, विद्यार्थी र दर्शकका लागि सहज वातावरण बनेको थियो । महोत्सवमा असहाय, बृद्धबृद्धा, अपाङ्गता भएका लागि निःशुल्क प्रवेशको व्यवस्था गरिएको थियो भने विद्यार्थीहरुका लागि प्रवेश टिकटमा छुटको व्यवस्था थियो । महोत्सवलाई सबैको साझा बनाउने आयोजकको प्रयास सफल बन्यो । वरिष्ट उपाध्यक्ष पंगेनीले, ‘महोत्सव सबैको हो भन्ने अपनत्व बोध गराउन सफल भयौं । महोत्सवमा उपस्थित सबै वर्गका दर्शकलाई कतै गुनासाहरु राख्ने ठाउँ दिएनौं ।’
विगतमा वालिङमा भए गरेका महोत्सवहरु भन्दा पिंक सिटी वालिङ महोत्सव साच्चिकै पृथक बन्यो । कलाकार, बालउद्यान, स्टल र मञ्चको व्यवस्थापन उदाहरणीय एवम् प्रशांसनिय रहयो । चर्चित गायन समूह ‘नाइन्टिज’ र कलाकार पल शाह महोत्सवको मुख्य आकर्षक बन्यो । आधुनिक तथा लोकदोहोरीका चर्चित कलाकारहरुलाई मञ्चमा उपस्थित गराइनुले महोत्सवको अर्को सफल पक्ष हो । चेम्बर अफ कमर्सका महासचिव गणेश राउतले महोत्सव सफलताको एउटा कोशेढुङ्गा भएको दाबी गरे । महासचिव राउत भने, ‘नयाँ टिम, नयाँ जोस र नयाँ जाँगरले आँटेर र गरेका कार्य सफल भयो । प्रथम पिंक सिटी महोत्सव–२०८१ वालिङका लागि एउटा इतिहास बन्यो ।’ महोत्सवले दोस्रो संस्कारणका लागि थप परिष्कृत र मजबुद बन्न प्रेरित गरेको महासचिव राउतले बताए ।
महोत्सवको मुख्य आकर्षक बनेको पालिका स्तरीय खुला पुरुष भलिबल प्रतियोगितालाई दर्शकको बाक्लो उपस्थितिले महोत्सव झनै सफल बन्यो । छ समूहले भाग लिएको प्रतियोगितामा दर्शकले टिभी, मोबाइल र अन्य सामाजिक सञ्जालमा देखेका खेलाडीहरुको खेल प्रत्यक्ष रुपमा अवलोकन गर्ने अवसर पाए । राष्ट्रिय खेलाडीहरु धन बहादुर भट्टा, हिमाल सुनारी, दुर्गा महतो लगायतको उपस्थितिले भलिबल प्रतियोगिताको उचाइ बढेको थियो ।
महोत्सव सम्पन्न भएको केही सातापछि आयोजकको व्यवस्थापनलाई लिएर अपवादका गुनासाहरु आएका छन् । कपोल्कल्पित, पूर्वग्रह र भ्रम सिर्जना गर्ने उद्धेश्यले गरिएको क्रियाकलापहरुले संस्था र आफूहरुलाई कुनै असर नगर्ने, नपर्ने चेम्बर अफ कमर्सका वरिष्ट उपाध्यक्ष मणि प्रसाद पंगेनीले बताए । उनले भने, ‘समाजका केही तत्वहरुलाई राजनीति गर्ने ‘बिजिनेस’ चाहिएको छ । हाम्रो संस्था र महोत्सवका क्रियाकलापलाई एउटा राजनीतिक बिजिनेस बनाउन खोजिएको छ ।’ चिया पसल र सामाजिक सञ्जाल कसले के भन्छ भन्न विषयले आफूहरुलाई नगर्ने, नपर्ने उनले बताए । आफूहरुबाट महोत्सव आयोजनाको क्रममा कुनै कमी कमजोरी नभएको उनले जिकिर गरे । सामाजिक सञ्जालको भ्रमको पछि नलाग्न आग्रह समेत उनले गरे ।
