१६ चैत्र, वालिङ । स्याङजाको वालिङ नगरपालिका ८ वालिङ मोडमा सञ्चालनमा रहेको गतिशील महिला बहुउद्धेश्यीय सहकारी संस्था लि.ले आफ्ना निक्षेपकर्ताहरुको रकम फिर्ता गर्ने भएको छ । सहकारीद्वारा वालिङ नगरपालिकालाई निक्षेप रकम फिर्ताका लागि आवश्यक सहजीकरण निवेदनमा फिर्ता रकम, मिति र स्थान सार्वजनिक भएको छ ।
निवेदनमा उल्लेख छ, ‘यस सहकारी संस्थामा निक्षेप गर्नु भएका सेयर सदस्यहरुको बचत रकम मिति २०८१ चैत्र १ गतेदेखि फिर्ता गर्ने भनी निर्णय गरिएकोमा विविध कारणले स्थागित हुन गएकोमा मिति २०८१ चैत्र ५ गतेबाट ५० हजार सम्मको रकम फिर्ता गर्ने व्यहोरा अनुरोध छ ।’
संस्थाको गत चैत्र ५ गते बसेको सञ्चालक समितिको बैठकको निर्णय अनुसार ५० हजार सम्मको निक्षेप रकम फिर्ता गर्ने निर्णय सहकारीले जनाएको छ । पछिल्लो समय सेयरकर्ता र निक्षेपकर्ताहरुले रकम फिर्ता मागेपछि सहकारीमा केही समस्या उत्पन्न भएको थियो । सहकारीले प्रारम्भिक चारणमा साना निक्षेपकर्ताहरुको रकम फिर्ता गर्नेभएपछि सहकारी सञ्चालनमा सहज वातावरण बन्दै गएको छ ।
यस्तो छ, रकम फिर्ता तालिका
वालिङ १ः चैत्र १२ देखि चैत्र मसान्तसम्म,
वालिङ२,३ र ४ः बैशाख १ देखि १० गतेसम्म,
वालिङ ५ र ६ः बैशाख ११ देखि २१ गतेसम्म,
वालिङ ७ र ८ः २०८२ बैशाख २२ देखि जेठ ५ गतेसम्म,
वालिङ ९ः २०८२ जेठ ६ देखि १६ गतेसम्म,
वालिङ १० र ११ः २०८२ जेठ १७ देखि २७ गतेसम्म,
वालिङ १२ः २०८२ जेठ २८ देखि असार १० गतेसम्म,
वालिङ १३ः २०८२ असार ३ देखि असार मसान्तसम्म र
वालिङ १४ः २०८२ साउन १ देखि १० गतेसम्म ।
अन्य पालिकाहरु हकमा भने चैत्र २० गतेसम्मका लागि रकम फिर्ता गर्ने तालिकामा उल्लेख गरिएको छ ।
