२१ फागुन, वालिङ । नेपाल सरकारका पूर्व कृषि तथा पशुपंक्षी विकास मन्त्री एवम् नेकपा (एमाले)का सचिव पद्मा कुमारी अर्यालले ‘समृद्ध नेपाल, सुखी नेपाली’ को नारा सफल बनाउन उद्यम र उद्यमशिलताको विकास अनिवार्य रहेको बताइन ।
बुधबार (आज) वालिङ चेम्बर अफ कमर्सद्वारा आयोजित प्रथम पिंक सिटी महोत्सवलाई सम्बोधन गर्दै पूर्वमन्त्री अर्यालले भनिन्, ‘आर्थिक विकासका लागि औद्योगिक क्षेत्रको अहम् भूमिका रहेको हुन्छ । उद्योगीहरुलाई लगानी मैत्रीको वातावरण बनाउनु आजको आवश्यकता हो ।’ देशलाई आत्मनिर्भर बनाउन देशमै उद्योगको विकास हुनुपर्ने उनले बताइन् । स्थानीय स्तरमा उत्पादनमा जोड दिँदा राष्ट्रिय अर्थतन्त्र बलियो हुने उनको जोड थियो ।
उद्योग, व्यापार, रोजगारी, उद्यमशीलता र मानवपूँजी समग्र आर्थिक विकासको सूचक रहेको बताउँदै देशमा ढुक्क भएर लगानी गर्न सरोकारवालाहरुलाई पूर्वमन्त्री अर्यालले आग्रह गरिन् । समग्रमा आर्थिक विकास भनेको सम्पूर्ण नागरिकको बहुपक्षीय विकास उनको तर्क थियो ।
देश विकासका लागि वालिङको समृद्धि अनिवार्य रहेकाले वर्तमान सरकारले प्राथमिकता साथ वालिङलाई हेर्न आग्रह गरिन् । ‘सरकारले वालिङलाई स्मार्ट सिटीको अवधारणका काम गरिरहेको छ’, पूर्वमन्त्री अर्यालले भनिन्, ‘स्मार्ट सिटी वालिङ अर्थात पिंक सिटी बन्न सके मात्र देशको समृद्धिमा एउटा इट्टा थपिनेछ ।’
आजबाट सुरु भएको महोत्सव चैत्र ३ गते सम्म चल्नेछ ।
