२५ फागुन, वालिङ । प्रथम पिंक सिटी वालिङ महोत्सव–२०८१ मा हुने पालिका स्तरीय खुला पुरुष भलिबल प्रतियोगिताको सम्पूर्ण तयारी सकिएको आयोजकले जनाएको छ । प्रतियोगिता सञ्चालनका लागि भलिबल ‘कोर्ट’, ‘प्याराफिट’, मञ्च, प्रवेशद्वार लगायत अफिसियल कामहरु सबै सकिएको वालिङ चेम्बर अफ कमर्सका सदस्य एवम् भलिबल प्रतियोगिताका संयोजक उम राज गुरुङ (राज) गुरुङले बताएका छन् ।
‘प्रतियोगिता सञ्चालनका आवश्यक सम्पूर्ण पूर्वाधार निर्माण गरिसकेका छौं,’ संयोजक गुरुङले भने, ‘दर्शकहरुलाई विशेष ध्यानमा राखेर दुई हजार जना क्षमता भएको अस्थायी प्याराफिट बनाएका छौं । खेल अवलोकन गर्ने दर्शकहरुको सुविधाका लागि प्याराफिट निर्माण गरिएको उनले बताए ।
प्रतियोगितामा प्रथम हुने समूहले १ लाख ५५ हजार रुपैयाँ, शिल्ड, मेडल र प्रमाण–पत्र पाउनेछन् । द्वितीय तर्फले नगद १ लाख ५ हजार, शिल्ड, मेडल र प्रमाण–पत्र र तृतीयले ५५ हजार शिल्ड, मेडल र प्रमाण–पत्र पाउँनेछन् । सन्त्वनाले पनि नगद ३० हजार रुपैयाँ, शिल्ड, मेडल र प्रमाणपत्र पाउँनेछन् ।
प्रतियोगिताको खेल अवधिभर उत्कृष्ट खेल प्रदर्शन गर्ने एकजना खेलाडीले नगद ५ हजार रुपैयाँ, प्रमाणपत्र, ट्रफी र मेडल पाउँनेछन् । यस्तै उत्कृष्ट स्पाइकर, उत्कृष्ट सेटर, उत्कृष्ट मिड ब्लकर, उत्कृष्ट सर्भर र उत्कृष्ट डिफेन्डर छानिने खेलाडीले नगद ३ हजार रुपैयाँ, प्रमाणपत्र र ट्रफी प्राप्त गर्नेछन् ।
प्रतियोगितामा धन बहादुर भट्ट, हिमाल सुनारी, विष्णु बस्नेत, सफल विक, दुर्गा महतो लगायतका राष्ट्रिय खेलाडीहरुले सहभागिता जनाउने आयोजकले बताए ।
माले बगरमा जारी महोत्सव चैत्र ३ गते सम्म चल्नेछ ।
