२६ फागुन, वालिङ । प्रथम पिंक सिटी वालिङ महोत्सवमा आयोजना गरिएको भलिबल प्रतियोगिताको उद्घाटन आज ११ः३० बजे हुने भएको छ । प्रतियोगिताको उद्घाटन वालिङ नगरपालिकाका प्रमुख कृष्ण खाँणले गर्ने कार्यक्रम रहेको वालिङ चेम्बर अफ कमर्सका सदस्य एवम् भलिबल प्रतियोगिताका संयोजक उम राज गुरुङ (राज) गुरुङले बताएका छन् । उद्घाटन खेल वालिङ नगरपालिका र चापाकोट नगरपालिकाबिच हुने आयोजकले जनाएको छ ।
प्रतियोगितामा वालिङ नगरपालिका, गल्याङ नगरपालिका, भीरकोट नगरपालिका, चापाकोट नगरपालिका, कालीगण्डकी गाउँपालिका र बिरुवा गाउँपालिकाकाले समूह दर्ता गराएकाे आयाेजकले जनाएकाे छ ।
प्रतियोगितामा धन बहादुर भट्ट, हिमाल सुनारी र विष्णु बस्नेत, महेन्द्र श्रेष्ठ, राजकुमार निरौला, दीपक थापा, दुर्गा महतो, सरन सामरी, हरि पाण्डे, संगम शिरीष, रेशम बि.क., उमेश सेञ्चुरी लगायतका राष्ट्रिय तथा अन्तर्राष्ट्रिय खेलाडीहरुले खेल्दैछन् ।
प्रतियोगितामा प्रथम हुने समूहले १ लाख ५५ हजार रुपैयाँ, शिल्ड, मेडल र प्रमाण–पत्र पाउनेछन् । द्वितीय तर्फले नगद १ लाख ५ हजार, शिल्ड, मेडल र प्रमाण–पत्र र तृतीयले ५५ हजार शिल्ड, मेडल र प्रमाण–पत्र पाउँनेछन् । सन्त्वनाले पनि नगद ३० हजार रुपैयाँ, शिल्ड, मेडल र प्रमाणपत्र पाउँनेछन् ।
प्रतियोगिताको खेल अवधिभर उत्कृष्ट खेल प्रदर्शन गर्ने एकजना खेलाडीले नगद ५ हजार रुपैयाँ, प्रमाणपत्र, ट्रफी र मेडल पाउँनेछन् । यस्तै उत्कृष्ट स्पाइकर, उत्कृष्ट सेटर, उत्कृष्ट मिड ब्लकर, उत्कृष्ट सर्भर र उत्कृष्ट डिफेन्डर छानिने खेलाडीले नगद ३ हजार रुपैयाँ, प्रमाणपत्र र ट्रफी प्राप्त गर्नेछन् ।
