२ चैत्र, वालिङ । आइतबार ‘प्रथम पिंक सिटी वालिङ महोत्सव–२०८१’ मा आयोजना गरिएको भलिबल प्रतियोगिताकाे फाइनल खेल हुनेछ । पालिका स्तरीय खुला पुरुष भलिबल प्रतियोगितामा उपाधिका लागि बिरुवा गाउँपालिका र गल्याङ नगरपालिकाबिच प्रतिस्पर्धा हुनेछन् । शनिबार सम्पन्न सेमिफाइनल खेलमा बिरुवा गाउँपालिकाले वालिङ नगरपालिकालाई र गल्याङ नगरपालिकाले भीरकोट नगरपालिकालाई हराउँदै फाइनलको यात्रा निश्चित गरेको हो ।
बिरुवा र वालिङबिच भएको खेलमा बिरुवाले ३–१ सेटको स्थितिमा खेल जित्यो । पहिलो सेट वालिङले २६–२४ र दोस्रो, तेस्रो र चौथो लगातर क्रमशः २४–२२, २५–१७ र २५–२३ सेटमा जित निकाल्यो ।
यस्तै गल्याङ नगरपालिका र भीरकोट नगरपालिकाबिच भएको प्रतिस्पर्धात्मक खेलमा गल्याङले ३–२ को स्थितिमा खेल जित्यो । पहिलो सेट भीरकोट २६–२४, दोस्रो गल्याङ २५–१९, तेस्रो भीरकोट २६–२४, चौथो गल्याङले २५–२० र पाँचौ सेट गल्याङले १५–१३ को अंक स्थितिमा जित निकाल्दै कष्ठपूर्ण रुपमा फाइनलको यात्रा तयार गर्यो ।
फाइनल खेल भोलि १ बजे हुनेछन् भने त्यसभन्दा पहिला ११ बजे तृतीय स्थान र सन्त्वना स्थानका लागि वालिङ र भीरकोट भिड्नेछन् ।
प्रतियोगितामा प्रथम हुने समूहले १ लाख ५५ हजार रुपैयाँ, शिल्ड, मेडल र प्रमाण–पत्र पाउनेछन् । द्वितीय तर्फले नगद १ लाख ५ हजार, शिल्ड, मेडल र प्रमाण–पत्र र तृतीयले ५५ हजार शिल्ड, मेडल र प्रमाण–पत्र पाउँनेछन् । सन्त्वनाले पनि नगद ३० हजार रुपैयाँ, शिल्ड, मेडल र प्रमाणपत्र पाउँनेछन् ।
प्रतियोगिताको खेल अवधिभर उत्कृष्ट खेल प्रदर्शन गर्ने एकजना खेलाडीले नगद ५ हजार रुपैयाँ, प्रमाणपत्र, ट्रफी र मेडल पाउँनेछन् । यस्तै उत्कृष्ट स्पाइकर, उत्कृष्ट सेटर, उत्कृष्ट मिड ब्लकर, उत्कृष्ट सर्भर र उत्कृष्ट डिफेन्डर छानिने खेलाडीले नगद ३ हजार रुपैयाँ, प्रमाणपत्र र ट्रफी प्राप्त गर्नेछन् ।
