चैत्र ५, वालिङ । वालिङ नगरपालिकाले किसानलाई ‘युरिया मोलासेस मिनरल ब्लक’ बनाउने तालिम दिएको छ । नगरपालिकाभित्रका व्यवसायिक बाख्रापालक किसानलाई युरिया मोलासेस मिनरल ब्लक बनाउने तालिम दिइएको हो ।
बैकल्पिक अहारको रुपमा प्रयोग गरियो ब्लकले दुग्धजन्य पशुमा दूधको र मासुजन्य पुशमा मासुको उत्पादकत्व बृद्धि गर्न ब्लक बनाउने तालिमको आयोजना गरिएको वालिङ नगरपालिकाका पशु शाखा प्रमुख डा. रोशन बस्यालले बताए । ‘पशुको पाचन प्रणालीमा खान पचाउन सुक्ष्म जीवणु आवश्यक हुन्छ,’ डा. बस्यालले भने, ‘रेसादार खान पचाउन ब्लकले राम्रो काम गर्छ ।’
नगरपालिकाले पहिलो चरणमा बाख्रापालक किसानलाई युएमएमबी ब्लक बनाउने तालिम प्रदान गरेको हो । तालिमले किसानको समस्यालाई समस्याहरुलाई समाधान गर्न र उत्पादकत्व बृद्धि गर्न तालिमले सहयोग पुग्ने नगरपालिकाले जनाएको छ । युरिया मल, खुदो वा गुण, धानको ढुटो, चोकर, नुन, पिना, खनिज लगायतबाट घरमै ब्लक बनाउन सक्ने भएकोले ब्लक बन्ने भएपछि किसानहरु आकर्षित बनेका छन् ।
वालिङ ११ स्थित दिल तारा बाख्रा फर्मका सञ्चालक ओम प्रकाश पंगेनीले भने, ‘हरियो घाँसको विकल्पमा स्थानीय स्रोत र साधान प्रयोग गरेर घरमै ब्लक निर्माण गर्न पाउँदा खुशी छौं ।’
ब्लक बाख्राले चाट्न मिल्ने एक प्रकारको खाद्यान्न हो । पशुहरूमा प्रोटिन तथा खनिज लवणहरूको कमीलाई हटाउन सस्तो र सरल उपाय रहेको पशु विज्ञहरुको बुझाई छ । यसको प्रयोगले पशुको पाचन प्रणालीमा खान पचाउन सुक्ष्म जीवाणु पैदा गर्ने कारण पशुको वृद्धि विकास राम्रो हुने पशु प्राविधिक डोलराज गैह्रेको भनाई छ । सुख्खा समयमा यसको प्रयोग गर्नाले २१ देखि २५ प्रतिशत सम्म उत्पादकत्व वृद्धि हुने गैह्रे बताउँछन् ।
कृषि पेशामा युवाहरुलाई आकर्षित गर्न वालिङ नगरपालिकाले विना धितो लगानी, खसी बोकाको बजारीकरणमा सुनिश्चित र प्राविधिक तालिम प्रदान गर्दै आएको छ । किसान लक्षित कार्यक्रमको कारण अहिले ४८ वटा फर्महरु नगरपालिकामा सुचीकृत भएर व्यवसायीक बाख्रापालन गर्दै आएका छन् ।
